[越空行者] 給50年後的我的講稿：
(50年後，我會成為一個老屎忽，放棄公義，加入建制，講一啲唔係人講嘅說話，而家寫定稿先。)
年青人，其實我地係好支持你地架，你地嘅創意啦~反叛啦~我有時就覺得社會太認真去對待你地囉，示威果啲就好自由嘅~咁你唔好阻到人，咁好阻到社會發展，咁你地咪示威囉……示夠你地就返屋企架啦~
其實大家退一步就海闊天空架啦~我地就唔好爭拗邊啲嘢係黑，邊啲嘢係白，你地咁樣呢，就只會做成社會撕裂架啫~唔好成日話人地唔比機會你發聲~你去一啲冇人阻你發聲嘅地方發聲咪得囉~目光放遠啲~
香港冇工作機會，你咪走囉~你去北京吖嘛~去大陸吖嘛……去北京唔係話一定有好啲嘅發展，不過香港冇機會吖嘛，你都要走架？唔好成日話留喺香港，你留都得~你留咪冇機會喳嘛~好公平係咪~你現實啲~
唔係叫你認命呀~只係叫你向現實低頭啫~嗱我都年輕過~我都試過走出嚟~咁但係唔work吖嘛，咁咪低頭囉~向現實低頭又唔係認命喎~到你個頭低到咁上下嘅時間~或者你就唔care你條命~到時咪唔洗認命囉~
我成日同人講窮呢，係唔會冇理由嘅~你窮你咪辛苦啲囉~總有出頭天架，你地咪當捱下囉，上一代都捱得辛苦架~咪一樣生存到~咁總會有生存唔到嘅~咁總有意外架嘛~
唔好介意要食一啲黑心食物~住一啲唔係人住嘅地方，社會係公平架，有人比人剝削，一定有人得益架~
成日講公義公義~公義係食唔飽人架嘛，係~咁冇公義都有好多人會食唔飽……咁從來政策都餵唔飽所有人架啦……咁但係如果連定政策果啲人都餵唔飽~咁又唔make sense吖嘛~雖然有啲政策都唔make sense~咁好正常吖~總有有啲唔合理嘅政策~又有啲合理嘅政策~先得平衡架嘛。
Search